قبل ما تركب الدستور، مش تعرف رايحين فين؟

Written by SaraLabib. Posted in Uncategorized

من حقك تنزل تقول رايك في الدستور أو متنزلش. براحتك. الإخوان نازلين عشان يقولوا نعم، ولو أنت مانزلتش الدستور ده هايعدي، يعني هايمضوا بدالك. ومش ها ينفع ترجع تقول أصلي ماكنتش أعرف

عايز تعرف الدستور ده هيخلي الإخوان يعملوا فيك ايه؟ اقولك:

لو عندك أرض: الإخوان هايقولولك ينفع تبني عليها ولا لا. ولو زرعتها هايقولولك تزرعها ايه، وتبيعلهم بكام

لو عندك محل: الإخوان هايقولولك تدفع كام للي شاغلين معاك حتي لو هم راضيين بالاقل. مش بس كده: هايخلوك تقاسم معاهم الربح في اخر الشهر

لو عندك بيت: الإخوان هايخلوك تسجل و هيلموا منك ضرائب عليه. ولو حبيت تعلي دور عشان تجوز الواد ولا البنت، جارك الإخواني هايبلغ عليك

لو أنتي ست: الإخوان هايقولولك ينفع تشتغلي ولا لا، ولو محتاجه الفلوس. ولو عندك عيال مش هايخلوكي تشتغلي في أي حاجه أنت عاوزاها

لو تعبت من المظاهرات: الإخوان بينزلوا يتظاهروا كل جمعه واديك شفت اللي عملوه في القضاه المحترمين من يومين
….

هاتقولي ما الحكومة كانت بتضيق علينا بردو وكنا بنتصرف. هاقولك المره ديه مختلفة: الإخوان في كل حتة هايسمعوا و يشوفوا ويبلغوا، مش زي البوليس. وعشان تمشي أمورك هاتلف عليهم واحد واحد عشان تبوس أيديهم و تترجاهم. وساعتها هاتعمل اللي هم عاوزينوه: تدخلهم شركا في ملكك، تبعلهم بالرخيص، تشغل قرايبهم بالعافيه

لو لسه عايز تعيش في الغلب ده خليك في البيت يوم السبت. لو تعبت من القرف ده انزل يوم السب وقول لا، ويا روح مابعدك روح

Trackback from your site.

Comments (1)

  • Mahmoud Daoud

    |

    هو ده التحليل الموضوعي ؟ انا عايز الماده كذا بتقول كذا معترض عليها عشان كذا وكذا وكذا ..
    ده اسمه -مع احترامي – هرتله !

    Reply

Leave a comment